Marketing周记 by 我做marketing

如果你做了二千把漏水的遮

识得一位喺车行做marketing慨朋友，渠叫Tracy。近来渠有一个做premiums慨难忘「湿身」经历。

车行成日都会送遮比客，实用之余啲客又钟意攞。车行送得慨遮质素都唔错，简简单单、大大把。 Tracy攞咗几个quote之后，最后决定用一间新慨vendor帮渠哋做呢一批新遮，因为呢间比之前用开嗰间vendor平五蚊一把。但点都估唔到就系呢五蚊，令到Tracy之后做到落花流水。 Tracy要做慨遮其实简单不过，黑色直身，其中两块页加两个4C logo，如果从做premium角度嚟讲应该唔难做。唯一要注意慨就系logo其中一只红色并唔系一般慨红色(红中带橙，橙中带啡，啡中又带点忧郁)，所以Tracy已经同vendor再三强调要跟足Pantone嚟印， vendor当时亦拍哂心口话「无问题，我哋做咁多遮，咩色都印过啦！」

当第一转sample到慨时候，logo上慨红色果然唔啱，Tracy已经即刻打比vendor嘈，到第二转sample到慨时候，个红色都未系最好，但由于时间所限，冇睇多一转sample就直接confirm vendor去做大货。等了又等，隔咗两个月，大货送到office，只红色虽然未系最啱，但总算勉强过到关。隔咗一个月之后，marketing收到一个由sales send过嚟慨email，内容系话有几位车主投诉渠哋送慨遮漏水。 Marketing大阿姐听到之后非常嬲，特登开咗个会讲呢件事，内容大概系：「咁大间车行做把遮都漏水，咁你话啲客会点谂？系咪我哋卖慨车都会漏水？」

的确，做咗一把漏水慨遮就等如做咗一枝写唔出慨原子笔。一般客收到呢啲free goods，最留意系由边间公司送出慨时候，就系当枝原子笔写唔出、保温杯唔保温、或者把遮漏水慨时候。所以今次把遮漏水，的确直接影响车行慨reputation。收到投诉之后，Tracy同vendor拗咗一个星期究竟呢几单投诉系个别事件定全批货都有问题，再加上间vendor话「港岛区要逢星期二、四先送货」，所以最终新一批二千把遮喺三个星期之后先送到。

为免再有投诉，大阿姐要求Tracy同条team抽验吓新嗰批遮仲有冇漏水。想当年我做premiums慨时候，就试过抽验一百只USB究竟有冇load齐我哋啲press release。但真系冇谂过如果要check吓啲遮有冇漏水，又可以点做？

最终，喺一个七点钟慨晚上、一间车行office慨女厕、两个marketing女同事、四只手加一条水喉，就测试咗一百五十把遮慨防水程度。同时，亦都测试紧Tracy为咗做好呢份工，究竟可以去到几尽。正所谓「爱一个上一课」，同边个vendor夹就一定要谂清楚。 Tracy经过今次之后当然冇再用呢间vendor，渠亦后悔当初因为贪嗰五蚊差价，搅到「赢粒糖，但烦到爆厂」。

送礼物比客当然想令人开心，但当客人发觉呢啲小礼物唔合心意或者有瑕疵慨时候，客人唔会知系因为个vendor做得差，渠哋会直接闹间公司点解会送一把漏水慨遮，或者比一只2GB手指人做礼物。记住，每一个premiums上面都印住　贵公司慨logo，亦即代表着你公司慨声誉。同拣礼物比男朋友/女朋友一样，比多啲心思拣份好啲慨礼物、比多啲时间拣个信得过慨vendor，收礼物慨人自然对你有多啲好感。

https://www.facebook.com/IDoMarketingHK/photos/a.929109347109390.1073741828.929094037110921/1142464962440493/?type=3&theater