Marketing週記 by 我做marketing

如果你做了二千把漏水的遮

識得一位喺車行做marketing嘅朋友，佢叫Tracy。近來佢有一個做premiums嘅難忘「濕身」經歷。

車行成日都會送遮比客，實用之餘啲客又鐘意攞。車行送得嘅遮質素都唔錯，簡簡單單、大大把。Tracy攞咗幾個quote之後，最後決定用一間新嘅vendor幫佢哋做呢一批新遮，因為呢間比之前用開嗰間vendor平五蚊一把。但點都估唔到就係呢五蚊，令到Tracy之後做到落花流水。Tracy要做嘅遮其實簡單不過，黑色直身，其中兩塊頁加兩個4C logo，如果從做premium角度嚟講應該唔難做。唯一要注意嘅就係logo其中一隻紅色並唔係一般嘅紅色 (紅中帶橙，橙中帶啡，啡中又帶點憂鬱)，所以Tracy已經同vendor再三強調要跟足Pantone嚟印，vendor當時亦拍哂心口話「無問題，我哋做咁多遮，咩色都印過啦！」

當第一轉sample到嘅時候，logo上嘅紅色果然唔啱，Tracy已經即刻打比vendor嘈，到第二轉sample到嘅時候，個紅色都未係最好，但由於時間所限，冇睇多一轉sample就直接confirm vendor去做大貨。等了又等，隔咗兩個月，大貨送到office，隻紅色雖然未係最啱，但總算勉強過到關。隔咗一個月之後，marketing收到一個由sales send過嚟嘅email，內容係話有幾位車主投訴佢哋送嘅遮漏水。Marketing大阿姐聽到之後非常嬲，特登開咗個會講呢件事，內容大概係：「咁大間車行做把遮都漏水，咁你話啲客會點諗？係咪我哋賣嘅車都會漏水？」

的確，做咗一把漏水嘅遮就等如做咗一枝寫唔出嘅原子筆。一般客收到呢啲free goods，最留意係由邊間公司送出嘅時候，就係當枝原子筆寫唔出、保溫杯唔保溫、或者把遮漏水嘅時候。所以今次把遮漏水，的確直接影響車行嘅reputation。收到投訴之後，Tracy同vendor拗咗一個星期究竟呢幾單投訴係個別事件定全批貨都有問題，再加上間vendor話「港島區要逢星期二、四先送貨」，所以最終新一批二千把遮喺三個星期之後先送到。
為免再有投訴，大阿姐要求Tracy同條team抽驗吓新嗰批遮仲有冇漏水。想當年我做premiums嘅時候，就試過抽驗一百隻USB究竟有冇load齊我哋啲press release。但真係冇諗過如果要check吓啲遮有冇漏水，又可以點做？

最終，喺一個七點鐘嘅晚上、一間車行office嘅女廁、兩個marketing女同事、四隻手加一條水喉，就測試咗一百五十把遮嘅防水程度。同時，亦都測試緊Tracy為咗做好呢份工，究竟可以去到幾盡。正所謂「愛一個上一課」，同邊個vendor夾就一定要諗清楚。Tracy經過今次之後當然冇再用呢間vendor，佢亦後悔當初因為貪嗰五蚊差價，攪到「贏粒糖，但煩到爆廠」。

送禮物比客當然想令人開心，但當客人發覺呢啲小禮物唔合心意或者有瑕疵嘅時候，客人唔會知係因為個vendor做得差，佢哋會直接鬧間公司點解會送一把漏水嘅遮，或者比一隻2GB手指人做禮物。記住，每一個premiums上面都印住　貴公司嘅logo，亦即代表著你公司嘅聲譽。同揀禮物比男朋友/女朋友一樣，比多啲心思揀份好啲嘅禮物、比多啲時間揀個信得過嘅vendor，收禮物嘅人自然對你有多啲好感。

https://www.facebook.com/IDoMarketingHK/photos/a.929109347109390.1073741828.929094037110921/1142464962440493/?type=3&theater